闽南语演说演讲稿.docx
《闽南语演说演讲稿.docx》由会员分享，可在线阅读，更多相关《闽南语演说演讲稿.docx（14页珍藏版）》请在冰豆网上搜索。
闽南语演说演讲稿
閩南語演說演講稿
各位評判老師，各位好朋友大家好，我是編號第--號，今仔日欲演講的題目是:
做伙愛地球 沈鈴惠作
這幾年來，全世界一直變熱，成做社會蓋大的議題，佇報紙、雜誌刊講：
南太平洋的島國吐瓦魯，地勢上低，因為溫室效應，海水的水面一直衝懸，造成嚴重的威脅，連北極的熊嘛強欲無岫通蹛，猶有真濟銷路賣甲真好的電影[2012]、『阿凡達』---等等也反映出人類的驚惶佮反省，[全球中央雜誌]的頭版新聞，寫講『我們正在煮地球』用這款譬相來講，若按呢落去，佇電影內底所做的，地球毀滅的情況真緊就會發生。
可惜，咱無真正愛地球，救地球，當咱坐高鐵的時陣，駛過闊莽莽的田園，看著的，毋若是青躘躘的田園佮山坡地，抑有彼的佇衝黑煙的大支煙筒，按怎罰嘛照常佇衝黑煙，空氣污染，落酸雨，遮攏是愛去注意環境的預防，咱的身體健康才有保障；佇千萬葩的電火，成做閃爍的台北夜景，得到世界第一的杜拜塔，也是全世界開上濟能源的建築，咱愛去好好思考，人講：
「煙火好看無偌久」，咱愛跤踏實地，毋通過度的開發，來用盡資源。
真正有做環保、愛地球的人，袂閬過生活的小問題，譬論講：
佇用的方面，阮阿爸講：
出門買物件愛紮環保袋仔；欲去較近的所在，會當用行路、騎腳踏車，抑是坐大眾運輸工具來代替；無佇房間要會記得關電火、電視---等等，若無袂閣用，要共插頭抽掉，按呢才會省錢閣省電；咱佇學校嘛是愛按呢，人講勤儉較有底，我講甲規山坪，不如咱一人做一件。
佇食的方面，加食寡菜疏佮果子，毋若身體健康，對大自然閣會當減少對能源轉換的浪費!
共三頓洗米的水，提來洗碗、沃花，減少資源的浪費，遮攏是上有效率佇運用大自然的方式，予這粒上媠的珍珠，會當繼續閃爍。
自從知影地球是因為人類過度的破害，致使全球的氣溫沓沓仔來衝懸，轉開電視，收音機抑是報紙，攏會看著真濟國家有地動，水災、土石流---等等，予百姓無厝通蹛，家破人亡，咱「人若無照天理，天就無照甲子」；所以若欲「觀星望斗，不如播田娑草」，做伙來愛護地球，未來的日子，才免憂愁。
我的演講到遮結束，多謝逐家。
2012.09.20.嘉義縣複賽第二名.演講者新港國中王巾玄學生
各位評判先生，各位好朋友大家好，我是編號第--號，今仔日欲演講的題目是:
影響我上深的一个人沈鈴惠作 咱人，人生的過程中，佇五花十色的社會環境，攏會拄著真濟無仝款的人物佮角色，有的人干焦雄雄對你的身軀邊經過，一句話嘛無講，甚至連看嘛無看著，有的人做同窗，同事，甚至視大、老師、筆友佮網路的朋友---等等
毋管做伙的時間是長抑是短，攏會予咱產生各種無仝款的體驗佮影響。
我經歷的人生，雖然猶無足久，拄著的人抑無夠濟，毋過這馬有一个影響我上深的人，就是我的同窗叫做阿惠。
無偌久進前，阮兩个人真好，毋管講天講地，講鱟桸講飯篱，逐項嘛講，去到佗位攏有阮兩的人的影跡，褲頭結做伙，人攏講阮是一个童乩一个桌頭，毋過我無夠頂真，毋捌想過伊的感受，無情的冷水，一遍閣一遍共伊潑甲澹糊糊，家己閣想講和伊足熟似，常在共創治，等到有一擺，伊擋袂調，若像火山爆發，山崩地離，阮溫溫的感情，煞自按呢來冷去，我家己真自責，為啥物無好好對待伊，嘛真後悔，干焦會曉一支喙吱吱陳，煞毋知捌字毋捌理，了錢閣了米。
想起阮鬥陣的彼段時間，足希望時間會當倒轉去早前，真數念做伙𨑨迌，食物件和讀冊的歡喜日子，按呢予我閣有機會好好對待伊，佇我的心內其實有真深的傷痕，我知影造成到這款的地步是家己，抑感覺真愧欠伊，敢講往事放水流，心情著較會消敨，真毋捌代誌的我，是按怎明明就真佮意和伊鬥陣，哪會欲和伊歹面相看，一直到這馬，我猶揣袂著答案，是毋是我需要閣再磨練，人講：
有經風霜有逢春，相信這遍的疼痛是我成長的過程。
經過這遍的教示，和人鬥陣的時陣，較會注意著家己的喙舌，平常時愛留這寡距離，感情較好維持。
佇遮我嘛欲感謝我的朋友阿惠，因為有這遍的吵鬧，
予我閣較捌代誌，也體會著「人吵有代誌，風透有雨意」，我佮厝的小弟小妹，這馬攏袂為著小可仔代誌來吵鬧，人講:
「苦瓜雖苦仝一藤，兄弟較歹仝一身」，兄弟姐妹是視大人留予我常好的伴，我應該好好把喔。
也因為這件代誌，阿惠指責我的毋著，予我有改進的機會，雖然我猶未失去一個好朋友，卻是得到深深的體會佮寶貴的經驗。
我的演講到遮結束，多謝大家。
各位評判先生，各位好朋友大家好，我是編號第--號，今仔日欲演講的題目是
有量才有福沈鈴惠作
佇二十世紀，現代科技的進步，人佮人的關係是愈來愈密切，真濟空課攏愛靠相關的人抑是傳隊，才會當拍拚出好的成績，佇這的時陣若欲合作順利，就愛看逐家是毋是有互相幫忙、互相體量，這馬的人受著環境的影響，隨人的意識漸漸提升，佇享受自由的當中，咱應該愛加一分尊重的態度，尊重別人的想法，接受無仝款的意見。
寬容是一種善良、一種美德、一種人的度量、也是一種修養的境界，這款修養的表現毋是軟汫，顛倒是一種力量佮吸引力，咱將心比心，加予別人一寡關懷、尊重佮方便，別人得著幫助佮安慰，咱嘛得著喜樂，朋友有困難，毋通徛懸山看馬相踢，愛親像「多拉A夢」按呢，伸手來幫助朋友，渡過難關，有一工換咱若有困難，愛受別人的幫助，咱著會體會出「予人食，較贏食人」。
佇咱台灣有真好的例，親像大企業家王永慶、郭台銘，出真濟錢起學校、辦學校、幫助慈善團體，做善事；閣有陳樹菊阿嬤，靠伊賣菜，來救助艱苦人，這種善心，毋但感動台灣人，也受著美國時代雜誌的表揚，咱看著陳樹菊阿媽活出伊的人生，展現咱台灣人的純情佮驕傲。
遮的例攏表現出的度量佮寬容，抑得著真大的福報，人講：
「心善福自來，善有善報、惡有惡果」，做惡的人，是得袂著福報。
天頂收納著真媠的雲彩，展現出天頂曠闊無限，山脈收納真濟的石頭，展現出伊的威嚴佮懸大，大海起起落落的海湧，不管是清氣仰是垃圾，攏袂共伊棄嫌，展現出大海的肚量，收納別人無愛的糞埽。
大肚的彌勒佛受著大家的喜愛，家己也笑咍咍真快樂，這攏是伊的心胸開闊，會當食別人毋敢食的苦；萬項代誌攏愛替別人想，人講：
「忍氣存福，出氣消福」，若自私，就佮別人歹鬥陣，咱要互相關心，互相幫助，做人腹腸愛開闊，俗語講；「吃虧就是占便宜」，付出愈濟得到的嘛愈濟，共食苦當做食補，有量才有福，按呢咱的社會一定會擱較溫暖，閣較有人情味，大家攏會當過著知足快樂、平安的日子。
我的演講到遮結束，多謝大家。
答喙鼓腳本
鳥仔沈鈴惠作
甲：
雙人行到青春嶺，鳥隻念歌送人行，溪水清青照人影，天然合奏音樂聲。
乙：
喂~你今日心情遮好，「烏矸仔貯豆油－無底看」。
汝擱會唱歌。
甲：
汝毋知喔~我幼稚園擱得到歌唱比賽的特優咧！
乙：
即厲害！
~按呢等一下，汝擱唱一首來予大家聽。
甲：
毋免等一下，現此時我就會使唱予大家聽。
乙：
阿是好阿未~「田中央起廟－卡正經咧」你未記得咱今阿日欲來共大家講鳥仔！
甲：
對喔！
歹勢歹勢！
（哈……）大家好~我是xxx
乙：
我是xxx
（行禮）
甲：
講著鳥仔，我知影誠濟，有鳥仔毛、鳥仔頭、鳥仔腳、鳥仔肝、鳥仔腱……
乙：
我咧老鳥、菜鳥、孤鳥、暗光鳥……
乙：
真正是凸假凸，彼啥曉，甘卡精采的~
甲：
無~你甘知，海鳥、粟鳥仔、青迪仔恰烏鴉。
乙：
無~你甘知，海鳥、吐血鳥、白頭翁恰斑鴿。
甲：
無汝甘別聽講，鳥仔予人送入去警察局。
乙：
警察局？
阿是啥麼鳥仔才奇怪，會予人送去警察局。
甲：
報紙刊甲即大篇，汝攏毋知影喔！
阿嘟一隻鶯哥啦！
乙：
鶯哥？
鶯歌閒閒無代誌，是怎樣會予人送入去？
講話欲講就要講透支，我捎攏無。
甲：
人講：
「細漢若無熨，大漢就熨屈」，就是主人無甲伊教予好，定定佇講「髒話」。
乙：
「彰化」？
阿不就是雲林閣過。
甲：
不是不是啦！
是罵人的髒話啦！
所以伊卡會予人送入警察局，管教管教。
乙：
有這嚴重喔~
甲：
是啊！
~所以親像鶯歌會學人講話，咱人講話就要小心。
乙：
哈~家在我飼的鳥仔不是鶯歌。
我是飼畫眉仔。
甲：
阿汝嘛咧「龜笑鼈無尾，鼈笑龜粗皮」伊嘛平平攏會講話阿！
甲乙：
宜~~~要注意呦~
甲：
講到鳥仔我是尚內行。
乙：
便所內彈吉他，汝猶擱咧臭彈。
甲：
我才無咧黑白講，烏面獵飛寒天來過冬，欲看就要來去曾文溪，住佇七股汐湖，尚水就是三、四月。
乙：
煞落來，八色鳥仔熱人來歇熱，山頂空氣透心肝，山林寶貝就是伊，要去汝就要找我。
甲：
君子鳥仔是蒼鷺，降落飛行很優雅，寬寬仔吃物袂趕緊，涼勢仔涼勢過生活。
乙：
尖尾鴨仔是候鳥，吃食甲意藏水內，川翹翹佇水頂，打拼吃物伊尚利，
甲：
敖敖敖，真正敖~
乙：
水水水，真正水~
甲：
想不到你嘛蹛佇巷仔內。
乙：
到今汝才知~
甲：
可惜環境予人來破害，天地所設的大自然，大家來保護咱台灣，過冬的鳥仔才會來。
乙：
過冬的鳥仔來咱遮，疼惜環境我知影，予恁生囝留後代，鳥語花香有靈聖。
甲：
是阿！
阿母擱，講才久，我喉嚨攏癢阿！
乙：
要唱歌喔~我嘛來綴你做伙唱，汝要唱啥物阿？
甲：
咱來唱一首大家攏會曉的，「白鷺鷥」。
乙：
讚讚讚，會曉大家來讚聲！
甲：
白鷺鷥。
乙：
車糞箕。
甲乙：
（車到溪仔墘，跋一倒，撿著二銑錢。
一銑撿起來好過年，一銑買餅送大姨~~~送大姨~~~送大姨~~~）
甲：
七股賞鳥好所在。
乙：
黑面獵飛渡過海。
甲：
過冬蹉跎伊會知。
乙：
相約知已做伙來。
甲乙：
大家…….要來喔~（落台行禮）
88.4月中年級組腳本和表演都是佳作
沈鈴惠作
語詞真心適沈鈴惠作
A:
秦歡喜
B:
祝美麗
A＆B：
上台行禮
A:
清明時節雨紛紛。
B:
路上行人欲斷魂。
A:
看你普普（phú-phú）阿，閣鬥（tàu）會起來。
B:
哈…哈…哈…昨昏阮母語老師拄好教到遮，順煞撿起來用。
A:
按呢?
我就共你考一下，這首古詩啥人寫的?
B:
是杜牧佇西元802年寫的對否?
A:
真正有兩步七啊!
想袂到清明節，親像詩內底的天氣黑陰黑陰，人嘛憂愁憂愁。
B:
規叢好好無挫，古早人流落來的季節佮節氣比國曆閣較準呢!
A:
恩，有影喔?
咱就來節（tsat）看mai７?
彼句「未食五月節粽，破裘仔毋願放」敢有準?
B:
你是相諍毋袂贏，相輸見擺輸!
A:
我功夫盡展，毋是欲佮你相偃，有什麼步數看現現，不免我加講，時到底牌你就翻。
B:
千外年的節氣，這馬都準!
準!
準!
唉!
我樹頭倚予在，毋驚樹尾做風颱。
A:
我請問你，啥物時陣的天氣會天黑黑閣落大雨，黑天暗地兼掃徦hê-hê-hê。
B:
哈哈!
我知我知是颱風天。
A:
啥貨，你閣講一擺！
B:
颱風天敢有毋著?
A:
唬!
你是叨位來的人客，腳馬suà予在，耳空拽予利，台語講風颱天啦。
B風颱佮颱風愛顛倒頭講喔!
閣誠心適呢？
A:
你若代誌未順，心情憂悶，來講語詞辯論，你就會心情輕鬆人出運。
B:
你咯真𠢕講，毋通來膨風，語詞講會通，我就o-ló你才高八斗萬事通。
A:
人講台語牛母華語講是『母牛』。
予你對（tuì）若有，送你一隻水牛。
B:
牛母對（tuì）牛公華語講是『公牛』，我lám-lám 馬嘛有一步踢。
A:
今（ta）就換你講予明，我來還，今仔日我真清閒，欲講就要講分明。
B:
台語狗母華語講是『母狗』。
我講了袂䆀，親像桌頂拈柑凊菜啦。
A:
借問咧，生卵雞佮生雞卵敢有仝意思?
B:
頭前有講過唉!
當然嘛仝意思。
A:
哈哈！
這就一丈差九尺，查某人放尿大差。
B:
意思敢無仝?
A:
生卵雞是專門生卵的雞，生雞卵是一般的雞生卵，差蓋濟咧!
魚佮蝦就分予清楚。
B:
唬~按呢講，我就知影唉!
雞公若扑雞母就會生雞卵。
A:
生你的頭啦!
雞公毋免扑雞母，雞母嘛會生雞卵!
B:
喔!
我予你舞甲霧煞煞，頭殼捎（sa）攏無，心肝是花膏膏（kô-kô）。
A:
去揣老師學學咧，才來和我講!
你是落車頭無探hioh。
B:
七月半普渡真鬧熱，華語講是『熱鬧』!
A:
恩!
你聽話頭就知話尾，毋是糊白畫，講了就會心開花。
B:
到今你才知，我巧巧，你一講我就會曉。
A:
閣有啥物顛倒頭講的，講兩項仔來鼻芳咧!
B:
頭前華語講『前頭』，崩山華語講『山崩』，酒醉華語講『醉酒』。
啥（siá）款。
A:
輸人毋輸陣，輸陣就歹看面。
我嚨喉清清咧，嚨喉華語講是『喉嚨』，清清咧，較有氣力甲你車拚，氣力華語講是『力氣』。
B:
兄弟！
你氣力大是袂當『霸凌』呢？
兄弟華語講是『弟兄』，suí hoonnh！
A:
安啦！
我只是講話較大聲，你就斟酌聽，請問品牌佮牌品敢有仝？
B:
當然嘛相仝。
A:
你一咳嗽，我就看到你的喉嚨，有𠢕無𠢕毋免hâu-siâu。
B:
啥貨，你毋是講華語佮台語是顛倒頭講爾爾！
敢講品牌佮牌品是無相仝。
A:
品牌佮牌品是精差一萬八千里，我看你抑是去讀冊讀幾冬矣!
才來和我講啦!
我誠無閒失禮!
B:
人客唉!
你聽看嘜?
自頭到尾，敢毋是秦歡喜伊兩字顛倒頭講爾爾，分明是欲掠我的鳥鼠仔空!
我才袂中計!
A:
評審老師你聽看嘜?
我敢有共冤枉。
咱佇遮諍袂煞，逐種語言攏有伊的suí，咱著要共生碳落去。
B:
無毋著！
母語文化欲流傳，囝孫代代要平安。
A:
父母生活的語言，千年萬代結姻緣。
A＆B:
阮的答喙鼓就到遮，感謝大家，落台行禮。
媠氣的疊詞沈鈴惠作
青青：
春天花正清香，雙人心頭照震動。
閒閒：
有話想欲對你講，毋知通亦毋通。
青青：
佗一項 。
閒閒：
敢也有別項，肉紋笑目睭降。
青青、閒閒:
你我戀花朱朱紅。
青青：
春天的嬰花有夠媠，閒閒佇遮賞花，講話兼約會。
閒閒：
阿你喙裡踅踅唸是佇傳佛經唷!
緊來共觀眾朋友請安問好。
青青：
我是青青。
閒閒：
我是閒閒。
青青、閒閒，上台行禮。
青青：
ㄟ──汝兩字相仝。
閒閒：
阿汝兩字嘛相仝。
青青：
咱著來講兩字仝款的疊詞，汝看按怎。
閒閒：
好阿！
咱著「八仙過海──各展神通」。
（行到旁仔提報紙）。
青青：
喂!
閒閒、汝「閒閒攏佇創啥物（tshuáinn）」？
閒閒：
啥貨，你一開門就共我消遣，哼!
我透早去散步吸（suh）一寡仔「清清」的空氣，閣看一下仔報紙（提報紙佇看）。
青青：
唉唷～你嘛真厲害！
青青（比家己）的空氣袂䆀hoonnh，報紙是刊啥，講來鼻香咧。
閒閒：
汝看──汝看──，報紙一層一層，疊疊做伙，內底嘛是按呢，層層疊疊的世間事，是真歹講。
青青：
是「鐵管生銑」無那會歹管。
閒閒：
毋是啦，是真濟代誌，僫講。
青青：
咱心肝若一丸一丸結做伙，心內嘛是按呢，閒閒結結做歸丸，唉!
你看「閒閒的時鐘，嘛無清清的心」時時刻刻無閒咧行。
閒閒：
哼!
你莫咧烏白講。
青青：
啥物咧──黑鼻管。
閒閒：
你看──你看──真真正正的的報紙寫實，宜蘭礁溪燒燒的溫泉，咧欲變做冷冷的溪水。
青青：
真正是有兩步七仔，燒燒──變冷冷──。
先人來台開墾土地，人講會將「黑土變黃金」，毋過，過度的開發，環境的破害，黃黃的硫璜，敢會變成黑黑的土。
閒閒：
講得好，清清的溪水，若無做好水土保持，溪水就會變成黃黃的黃河，是不是連鞭閣變成黑黑的溪河。
青青：
汝真正𠢕，清清變黃黃閣變黑黑。
閒閒：
啥叫你矮人壁──欠推（梯）。
青青：
我輸人毋輸陣，輸陣著歹看面，佇網路我也看著日本2011年3月11的東北大地震，平平媠媠的沙埔，變做懸懸低低，凹凹兼凸凸的石頭埔。
閒閒：
天災地變真正予人驚這平平會變凹凹，福岡的毒氣嘛會予青青的樹仔欉變成萎萎的柴仔枝。
青青：
我的喙鬚予汝剃甲足清氣，清清的空氣變成濁濁的毒氣。
閒閒：
彼黑黑黑的毒氣，毋知當時才會回復清清清的空氣。
青青：
附近青森的蘋果，外皮是媠媠媠，毋過想著欲食著驚驚驚。
閒閒：
地動了後，彼懸懸懸的樓仔厝，必（pit）甲一巡一巡，無情的怪手就將伊拆甲平平平。
青青：
苦憐的百姓毋著閒閒的目睭掠伊金金相。
閒閒：
實實在在予人足感動，「苦瓜燖鰱魚──苦憐」，汝真正是「黑矸仔貯豆油無底看」。
青青：
真歹勢，互相漏氣求進步，袂使得氣怫怫őo。
閒閒：
我的風度真好，汝嘛袂使得氣掣掣。
青青：
咱臺語的疊詞真正媠，今仔日歡歡喜喜來遮𨑨迌。
。
閒閒：
咱講兩句仔好話來祝福，快快樂樂著欲來轉去。
青青：
百姓為生活，過度來開發，環境來變化，趕緊想辦法。
閒閒：
世界天氣變化大，眼光心胸要開闊，新聞網路要捷看，無看欲那會快活。
青青、閒閒:
落台行禮。
青青:
再會。
閒閒:
再會。
元宵節沈鈴惠作
甲：
秦心適（手拿葵扇）。
乙：
祝幸福（提手巾仔）。
甲：
請問祝幸福有佇厝bòo。
乙：
是tuè一個青仔欉咧大細聲，（開門的動作）哦～是秦心適喔，緊入來坐。
甲：
您兜真四適呢，閣有春天新正年頭的氣氛。
乙：
當然nòo（唱）「春天佇佗位，我去問花蕊，花蕊講伊才睏醒，叫我去問露水」。
甲：
你猶佇唱這囡仔歌，笑死人，綴袂著流行啊！
呰嘛當佇流行IwantnobodynobodybutYou
IwantnobodynobodybutYou
다른사람은싫어니가아니면싫어
Iwantnobodynobodynobodynobody，媠bòo。
乙：
哼！
你喔！
敢知影「阿婆仔穿黛安芬－－叫做袂博假博」，人阮是佇唱有景緻的歌曲，毋才有春天的好氣氛。
甲：
是按呢哦（摸一下仔頭）sorrysorry，sorrysorry（手挲一下挲一下）。
乙：
人講「春天後母面」，春天的天氣確實變化真大。
甲：
你的刀甭閣磨甲才利，我會驚。
乙：
秦心適，汝敢知影春天上媠的節日是啥物時陣？
甲：
親像「關公賣豆腐－－簡單啦」我當然嘛知影，就是元宵節。
乙：
汝真正是「黑矸仔貯豆油－－無底看呢！
」
甲：
換我問你，咱這馬元宵節攏有攑鼓仔灯，賞花灯，啊這風俗是按怎來的。
乙：
毋是我佇螿蜍展氣功，摮膨風，問我就對仔。
甲：
講來聞香咧！
乙：
元宵節聽講對漢武帝開始就有啊，元宵是一個宮女的名，因為做宮女袂當佮厝裡的人見面，伊想欲自殺。
甲：
hann9！
死去喔！
毋就「苦瓜燉連魚－－苦憐」，hoonn9、hoonn9！
乙：
猶未死啦！
甭哭甲遮呢慘，落尾去予一個大官解救，彼個大官為著欲達成元宵佮厝裡的人團圓，才有賞花灯、食元宵、攑鼓仔灯、臆謎猜、放炮仔，相連紲的慶祝活動。
甲：
好聽，好聽（拍手）「三房二廳」實在予人感動。
乙：
佇元宵暝賞花灯，拄仔好會當順紲揣對象，聽講彼工，查某囡仔講要「偷挽蔥，才會嫁好翁」「偷挽菜，才會嫁好婿。
」
甲：
我知我知，查甫的愛「跳菜股，才會娶好某。
」（跳落去 倒跋倒）
乙：
哈哈！
「上帝公跋輸跤－－當龜。
」（拍手）
甲：
唉唷！
尻川pit兩邊，真正是「啞口食黃蓮－－有苦難言。
」
乙：
想欲揣「土豆擘殼－－愛仁（愛人）喔！
」，無才呢簡單，秦心適，元宵節佫叫做上元節，嘛是小過年，咱做伙來去爽好bòo。
甲：
好是好！
彼台南鹽水的蜂仔炮是真刺激，毋過感覺真危險，我看，抑是甭去較好。
乙：
真正是惡人無膽，我看汝抑是宓佇厝裡看電視轉播，有台東的炮炸韓單爺（武財神）、台北縣平溪鄉的放天灯，閣有苗栗後龍的擲炮城，逐年攏辦佫真成颺。
甲：
毋成猴，你佫知影遮濟民俗活動，「電視、學校攏有佇宣傳，全國花灯佇嘉義，歸家做伙來看戲，元宵歸暝蓋歡喜。
」
乙：
佇嘉義喔！
緊來去！
「虎年主帥大吉祥，大街小巷人kheh人，煙火好看媠噹噹，炮仔聲乒乒乓乓。
」
甲：
恭祝虎年行大運
乙：
文化遺產愛傳承
甲：
關懷鄉土來牽成
乙：
台灣觀光第一等
秦心適，祝幸福：
大家要把握好時機，來阮嘉義迭迌喔！
（落台行禮）
升级会员 